Цікавая экскурсія па зямлі беларускай
Група педагогаў Воранаўскага раёна пад кіраўніцтвам Анны Іванаўны Галаўні —сацыяльнага педагога Радунскага сацыяльна-педагагічнага цэнтра здзейсніла экскурсію па маршруце Ружаны-Косава-Жыровічы. Удзельнікі наведалі Ружанскі палац — помнік архітэктуры, адзін з буйнейшых палацавых комплексаў Беларусі 17-18 стагоддзяў.
Не менш уражанняў і цікавасці выклікала наведванне Косаўскага палацава-паркавага ансамбля Пуслоўскіх — унікальнага помніка неагатычнай архітэктуры 19 стагоддзя з раскошнымі заламі, шыкоўнымі люстрамі, каштоўнай мэбляй, дарагім посудам.
Чароўная панарама наваколля адкрываецца перад вачыма наведвальнікаў на ўзвышшы замка.Незвычайнасць пейзажу толькі падкрэслівае прыгажосць Косаўскага палаца. Усё ўбачанае ўражвае і прыцягвае падарожнікаў.
Паданні, пачутыя пра Косаўскі замак, здзівілі сваёй незвычайнасцю і таямнічасцю. Адна з легенд гаворыць пра тое, што для аховы замка гаспадары трымалі льва, якога ноччу выпускалі блукаць па калідорах. Пачулі легенду і пра “музычную” асаблівасць палаца і пра 25-кіламетровы падземны ход паміж Косаўскім палацам і рэзідэнцыяй Сапегаў у Ружанах.
Наступным прыпынкам стала наведванне Жыровіцкага Свята-Успенскага манастыра, які нясе святло духоўнасці беларускаму народу. Аб гісторыі яго ўзнікнення і далейшым лёсе расказаў студэнт Мінскай духоўнай семінарыі. У кожнага з наведвальнікаў была магчымасць пакланіцца Жыровіцкай цудатворнай іконе Божай Маці.
Наведалі і крынічку са святой вадой. Ва ўсіх жадаючых была магчымасць акунуцца ў купелі, а пасля адчуць незвычайную бадзёрасць і лёгкасць.
Дык чым жа вабіць нас да сябе гэты куток зямлі беларускай? Адказ просты: сваёй прыгажосцю, непаўторнасцю і цікавай гісторыяй.
Іван ГАБІС,
сацыяльны педагог
Паляцкішскай сярэдняй школы.